Orientering frå styret i Herøysund Bygdalag og undergruppene

Styret i Herøysund Bygdalag

Me har jobba ein del med å organisera ein vårbasar som gjekk av stabelen rett før påske. Dette var naudsynt då det var lite pengar på kontoen. Basaren drog inn til saman 18 197,- (brutto) som me er veldig nøgde med! Tusen takk tilalle som bidrog til dette. Bygdafolket støtta som vanleg veldig godt opp, både med å gje gåver, kjøpa lodd og ikkje minst kom på arrangementet. Tusen takk til alle!

Vidare har styret søkt om midlar til å byta ut vindaugo inne i Grendahuset, og for å kjøpa ny oppvaskmaskin til kjøkenet. Det er også planar om å kjøpa inn ein plenklyppetraktor i lag med båtlaget for å letta arbeidet med å halda strandområdet fint. Dette har me ogsåsøkt om midlar til. Tida no skal brukast til å planleggja dans i Grendahuset påjonsokafta, og eit anna arrangment nærare jul.

Stranda

I 2012 vil strandgruppa jobba for å få på plass ny plentraktor, vedlikehald av bruene og me ynskjer å sjå nærare på drenering rundt volleyballbanen. Også i år vert me avhengige av at folk stiller opp for å klyppa plenen og vaska toaletta.Det kjem opp ei tavle med lister på toaletthuset.

Grendahuset: Jarle Bruntveit, Henry Aakre og Anne-Grethe Høisæther.
Jarle Bruntveit har no ansvaret for utleige av huset. Det er mykje i bruk, og det er tydeleg at ein del vedlikehald må påreknast. Det viktigaste er å få bytta vindaugo inne i salen. Elles håpar me å få lakka golvet og bytta ut oppvaskmaskinen. Det er også viktig å sjå om me kan få gjort noko med drenering rundt huset. Elles har det kome på plass brannsikringsutstyr i huset.

Grendahuskafeen
Grendahuskafeen har open kafe annakvar veke heile året minus juli. Dei har brukt noko av overskotet til å kjøpa nye panner til Grendahuset. Det seier me tusen takk for! Sjå på arrangementsida for å finna datoane for kafeen.

Postvegen
Are Uppheim vart vald til å fortsetta 2 år til for Herøysund i arbeidet med postvegen i Interesselaget Postvegen Ølfernes – Herøysund. Arbeidet er no i gong for å få på plass den siste strekninga frå Liland mot postbrygga.

Trafikksikringsgruppa
Arbeidet dreiar seg om å få på plass gang- og sykkelsti i Herøysund. Det er 35 grunneigarar involvert, og trafikksikringsgruppa vilprøva å få kontakt med desse. Vi må kanskje også leggja press på kommunen for å få bli prioritert.

Sløyden

Sløyden har no fått kjøpt inn det utstyret som trengst for å ha eit skikkeleg og godt øvingslokale. Lokalet vert brukt av fleire ungdomsgrupper, og kvar torsdagskveld er det øving for musikkglade vaksne.