Storprosjekt i gong

Musikkprosjektet SLØYDEN

5-7 exmusikarar/musikkinteresserte har no teke initiativ til å få ein plass å vera for ungdom i bygda som er interesserte i å læra å spela i band. No har entusiastane, i samarbeid med Herøysund Bygdalag, sett i gong med å rydda kjellaren i den gamle delen av grendahuset. Då gamleskulen var i drift, var dette sløydsalen.

Prosjektet er delt i tre deler og vert realisert etter kvart som pengane kjem.

Del 1 Riving/reparasjon/oppussing av «Sløyden»

Del 2 Kjøp av instrument/songanlegg

Del 3 Grøfting og tetting av grunnmur i den «nye» delen av kjellaren.

Saka har vore til handsaming i styret for grendahuset, og der var det ingen negative merknader. Siste styremøte i bygdalaget hadde berre positive merknader, og løyvde 10000 kr til prosjektet. I tillegg betalte kvar styremedlem 500 kr og utfordar no alle som har gått på sløyden i gamleskulen til å følgja opp! Det same gjeld sjølvsagt dei som ikkje har gått i gamleskulen!

Status er følgjande: Det er budsjettert med 150.000 kr og pr i dag har vi 22.500. Kjempeflott start! (Før vi eigentleg er i gong)

Muntleg har vi fått positiv stønad frå kommunen, men her vert ikkje tildelinga før i sommar. Vi håpar også på stønad frå næringslivet som ser det positive med eit ungdomstilbod i bygda. Men som så ofte før er det bygdefolket som er dei sikraste vi kan lita på.

Tek du utfordringa frå bygdalagsstyret, kan du gjera dette ved å bruka

bankgiro 3460.07.52695.

NB! Merk innbetalinga med MUSIKK